რა სურს პუტინს და დაასრულებს თუ არა რუსეთი ომს?
1647540663
როდესაც ვლადიმირ პუტინმა დაარღვია ევროპაში მშვიდობა 44 მილიონიანი დემოკრატის წინააღმდეგ ომის გაჩაღებით, მისი გამართლება იყო ის, რომ თანამედროვე, დასავლეთისკენ მიდრეკილი უკრაინა მუდმივი საფრთხე იყო და რუსეთი ვერ გრძნობდა თავს დაცულად. მაგრამ დაბომბვის, ათასობით ადამიანის დაღუპვისა და მილიონობით ლტოლვილის შემდეგ ჩნდება კითხვა: რა არის მისი ომის მიზანი და არის თუ არა გამოსავალი?
რა სურს პუტინს?
მიზნები, რომლებიც მან დასახა შეჭრის დასაწყისში, როგორც ჩანს, შემცირდა ომის დროს. ის ფიქრობდა, რომ ომს სწრაფად მოიგებდა, მაგრამ ცხადია, რომ ის ამ ომს ხედავს, როგორც გადამწყვეტ მომენტს რუსეთის ისტორიაში.
„რუსეთის მომავალი და მისი მომავალი ადგილი მსოფლიოში საფრთხის წინაშეა“, - ამბობს საგარეო დაზვერვის უფროსი სერგეი ნარიშკინი.
რუსეთის ლიდერის თავდაპირველი მიზანი იყო უკრაინის დამხობა და მისი მთავრობის გადაყენება, რაც სამუდამოდ დაასრულებდა მის სურვილს გაწევრიანებულიყო დასავლურ თავდაცვით ალიანს ნატოში.
პუტინმა რუს ხალხს უთხრა, რომ მისი მიზანი იყო „უკრაინის დემილიტარიზაცია და დენაციფიკაცია“.
„არ არის ჩვენი გეგმა უკრაინის ტერიტორიის ოკუპაცია. ჩვენ არ ვაპირებთ ვინმეს ძალით რაიმე დავაკისროთ“, - ამტკიცებდა ის.
დაბომბვა გრძელდება - მაგრამ რუსეთი აღარ ცდილობს მთავრობის დამხობას და ამის ნაცვლად მიზნად ისახავს ნეიტრალურ უკრაინას.
რატომ სურს პუტინს ნეიტრალური უკრაინა?
მას შემდეგ, რაც უკრაინამ დამოუკიდებლობა მოიპოვა 1991 წელს, საბჭოთა კავშირის დაშლის შემდეგ, იგი თანდათან გადაიხარა დასავლეთისკენ - ევროკავშირისა და ნატოსკენ. რუსეთის ლიდერი მიზნად ისახავს შეცვალოს ეს.
მისი თქმით, რუსები და უკრაინელები ერთი ხალხია.
„უკრაინას არასოდეს ჰქონია ნამდვილი სახელმწიფოებრიობის ტრადიცია“, - ამტკიცებდა ის და უარყოფდა უკრაინის ისტორიას.
2013 წელს მან ზეწოლა მოახდინა უკრაინის პრორუს ლიდერზე, ვიქტორ იანუკოვიჩზე, არ მოეწერა ხელი ევროკავშირთან შეთანხმებას, რამაც გამოიწვია საპროტესტო გამოსვლები.
რუსეთმა საპასუხოდ 2014 წელს დაიპყრო უკრაინის სამხრეთ რეგიონი, ყირიმი და გამოიწვია აჯანყება აღმოსავლეთში, მხარი დაუჭირა სეპარატისტებს, რომლებიც ებრძოდნენ უკრაინის ძალებს რვაწლიან ომში, რომელმაც 14000 ადამიანის სიცოცხლე შეიწირა.
იყო ცეცხლის შეწყვეტა და 2015 წლის მინსკის სამშვიდობო შეთანხმება, რომელიც არასოდეს განხორციელებულა.
შეჭრამდე, პრეზიდენტმა პუტინმა გაანადგურა სამშვიდობო შეთანხმება და ცნო რუსეთის მიერ მხარდაჭერილი ორი სახელმწიფო უკრაინისგან დამოუკიდებლად.
არის ამ ომიდან გამოსავალი?
უკრაინის პრეზიდენტის მრჩეველი მიხაილ პოდოლიაკი მიიჩნევს, რომ ცეცხლის შეწყვეტა, შესაძლოა, უახლოეს დღეებში დაიწყოს, რადგან რუსული ძალები თავიანთ ამჟამინდელ პოზიციებზე არიან ჩარჩენილი.
ორივე მხარე დადებითად საუბრობდა მოლაპარაკებების პროგრესზე და პოდოლიაკი ამბობს, რომ რუსეთის პრეზიდენტმა შეარბილა მისი მოთხოვნები.
ომის დაწყებისას რუსეთის ლიდერს სურდა უკრაინას ეღიარებინა ყირიმი რუსეთის ნაწილად და ეღიარებინა სეპარატისტების მიერ მართული აღმოსავლეთის დამოუკიდებლობა.
ყირიმის მომავალი სტატუსი და რუსეთის მიერ მხარდაჭერილი სახელმწიფოები ლუგანსკსა და დონეცკში ჯერ კიდევ შორს არის გადაწყვეტისაგან, მაგრამ ისინი შეიძლება არ იყოს გარიგების დამრღვევი, თუ მხარეები შეთანხმდებიან ამ საკითხის მოგვიანებით გადაწყვეტაზე.
როგორც ჩანს, რუსეთმა აღიარა, რომ მას არ შეუძლია გადააყენოს უკრაინის ხელმძღვანელობა და შეცვალოს იგი მარიონეტული მთავრობით, როგორც ეს ბელორუსიაშია.
რუსეთი განიხილავს „ნეიტრალურ, დემილიტარიზებულ“ უკრაინას საკუთარი არმიით და საზღვაო ფლოტით, ავსტრიის ან შვედეთის ხაზით, რომლებიც ორივე ევროკავშირის წევრია. ავსტრია ნეიტრალურია, შვედეთი კი - არა.
ყველა არ არის დარწმუნებული, რომ რუსეთი კეთილსინდისიერად აწარმოებს მოლაპარაკებებს. საფრანგეთის საგარეო საქმეთა მინისტრი ამბობს, რომ მოსკოვმა ჯერ ცეცხლის შეწყვეტა უნდა გამოაცხადოს.
რა მოთხოვნები აქვს უკრაინას?
ვოლოდიმირ ზელენსკის მრჩეველი ამბობს, რომ უკრაინის მოთხოვნები ნათელია: ცეცხლის შეწყვეტა და რუსული ჯარების გაყვანა, მაგრამ, ასევე, იურიდიულად სავალდებულო უსაფრთხოების გარანტიები.
უკრაინამ, ასევე, შეარბილა თავისი პოზიცია რუსეთის შეჭრის შემდეგ, პრეზიდენტმა ზელენსკიმ აღნიშნა, რომ უკრაინელებს ახლა ესმით, რომ ნატო მათ წევრად არ მიიღებდა: „ეს სიმართლეა და ის უნდა იყოს აღიარებული“.
მიაღწევს თუ არა პუტინი შეთანხმებას ნატოსთან?
რუსეთის პრეზიდენტმა გააორმაგა დასავლეთისა და მისი 30-წევრიანი თავდაცვითი სამხედრო ალიანსის მიმართ ზიზღი. ის შესაძლოა უკრაინასთან კომპრომისზე წასვლას განიხილავს, მაგრამ მიიჩნევს, რომ დასავლეთს ერთი მიზანი აქვს - რუსეთში საზოგადოების გახლეჩა და საბოლოოდ მისი განადგურება.
ომის დაწყებამდე მან მოითხოვა, რომ ნატომ შეცვალოს მისი აღმოსავლეთის მიმართულებით გაფართოება, ჩამოეშორებინა თავისი ძალები და სამხედრო ინფრასტრუქტურა წევრი ქვეყნებიდან, რომლებიც შეუერთდნენ ალიანსს 1997 წლიდან და არ განათავსონ „დარტყმითი იარაღი რუსეთის საზღვრებთან“. ეს ნიშნავს ცენტრალურ ევროპას, აღმოსავლეთ ევროპასა და ბალტიისპირეთს.
გორბაჩოვმა განაცხადა, რომ „ნატოს გაფართოების თემა არასოდეს განხილულა“.
გერმანიის კანცლერი ოლაფ შოლცი მიიჩნევს, რომ რუსეთის პრეზიდენტს „სურს ევროპის ხელში ჩაგდება“. პრეზიდენტმა ჯო ბაიდენმა კი პუტინს ომის დამნაშავე უწოდა.
ომამდე რუსეთმა მოითხოვა აშშ-ის ყველა ბირთვული იარაღის აკრძალვა მათი ეროვნული ტერიტორიების მიღმა. შეერთებულმა შტატებმა შესთავაზა მოლაპარაკებების დაწყება, მაგრამ ჯერჯერობით ამის შანსი მცირეა.
რა იქნება რუსეთის შემდეგ?
პრეზიდენტი პუტინი დასავლეთის პასუხით გაოგნებულია. სანქციები დრამატულ გავლენას ახდენენ რუსეთის ეკონომიკაზე - და ის გაბრაზებულია.
დასავლეთმა რუსეთის ცენტრალურ ბანკს გაუყინა აქტივები და მსხვილი ბანკები დახურეს, გათიშეს SWIFT გადახდის საერთაშორისო ქსელიდან.
შეერთებულმა შტატებმა აკრძალა რუსული ნავთობისა და გაზის იმპორტი, ევროკავშირი მიზნად ისახავს ერთი წლის განმავლობაში გაზის იმპორტის ორი მესამედით შემცირებას.
გერმანიამ შეაჩერა რუსული გაზსადენის „ჩრდილოეთის ნაკადი 2 “-ის დამტკიცება, რომელიც რუსეთის და ევროპული კომპანიების მთავარი ინვესტიციაა.
რუსულ ავიაკომპანიებს აეკრძალათ ევროკავშირის, დიდი ბრიტანეთისა და კანადის საჰაერო სივრცეში შესვლა.
პერსონალური სანქციები დაწესებულია პრეზიდენტ პუტინზე, საგარეო საქმეთა მინისტრ სერგეი ლავროვსა და ბევრ სხვა პირზე.
სამაგიეროდ, ის რუსებს დაუპირისპირდა, რომლებიც ომს ეწინააღმდეგებოდნენ. თითქმის 15 000 მომიტინგე დააპატიმრეს და პრაქტიკულად ყველა დამოუკიდებელი მედია გაჩუმდა. აღარ დარჩა ოპოზიცია, რადგან ისინი ან გაიქცნენ ქვეყნიდან, ან ოპოზიციის ლიდერის ალექსეი ნავალნის შემთხვევაში, ისინი ციხეში მოხვდნენ.
„რუსი ხალხი ყოველთვის შეძლებს განასხვაოს ნამდვილი პატრიოტები ნაძირალებისა და მოღალატეებისგან“, - აცხადებს რუსეთის პრეზიდენტი.
მასალა მომზადებულია BBC-ის მიხედვით.
აგრეთვე დაგაინტერესებთ:
⭕ პუტინმა შესაძლოა ბირთვული იარაღი გამოიყენოს - აშშ-ის ოფიციალური პირები
⭕ საფრანგეთი უნდა მოემზადოს ევროპაში ომისთვის - ემანუელ მაკრონი
⭕ ჩინეთი „მშვიდად“ შორდება იზოლირებულ რუსეთს - CNN
⭕ რამდენად ხარ გარკვეული რუსეთ-უკრაინის ომის პროცესებში - ქვიზი
⭕ რუსებმა ხარკოვის რეგიონი დაბომბეს - დაიღუპა 6 ადამიანი
⭕ კიევის ოლქში დაბომბვას ორი წლის ბავშვის სიცოცხლე ემსხვერპლა
⭕ კადიროვი უკრაინაში 1 000 მებრძოლს აგზავნის
⭕ ლუკაშენკომ არესტოვიჩის წინააღმდეგ სისხლის სამართლის საქმე აღძრა
⭕ იაპონიის მახლობლად ოთხი რუსული სადესანტო ხომალდი გადაადგილდება - იაპონური მედია (ფოტოები)
