უცხოეთი
ამერიკის შეერთებული შტატების პრეზიდენტის ადმინისტრაციაში განაცხადეს, რომ რუსეთის „საპრეზიდენტო არჩევნები“ არ აკმაყოფილებდა არანაირ კრიტერიუმს. ბაიდენის ადმინისტრაციაში ამბობენ, რომ რუსეთში „არჩევნები“ არც თავისუფალი იყო და არც სამართლიანი. „რეალობა ისაა, რომ პრეზიდენტი პუტინი არის რუსეთის ფედერაციის პრეზიდენტი. ფაქტია, ის არის პრეზიდენტი და ის ხელმძღვანელობს რუსეთს“, - განაცხადა აშშ-ის პრეზიდენტის მრჩეველმა ეროვნული უსაფრთხოების საკითხებში ჯეიკ სალივანმა ბრიფინგზე. სალივანის თქმით, „არჩევნების“ ეს შედეგი პროგნოზირებადი და მოსალოდნელი იყო. „პუტინმა დახურა პოლიტიკური სივრცე, დააპატიმრა პოლიტიკური ოპონენტები. მისი ზოგიერთი პოლიტიკური ოპონენტი ტრაგიკულად დაიღუპა. ასე რომ ყველაფერი მოსალოდნელი იყო“, - დასძინა ჯეიკ სალივანმა.
მესაზღვრეების საბრძოლო შესაძლებლობები უნდა გაიზარდოს როგორც ხმელეთზე, ასევე ზღვაზე, განსაკუთრებით, შავი ზღვის რეგიონში, - ამის შესახებ რუსეთის პრეზიდენტმა ვლადიმერ პუტინმა FSB-ის საბჭოს გაფართოებულ სხდომაზე სიტყვით გამოსვლისას განაცხადა.„ჩვენ კიდევ უფრო უნდა გავზარდოთ სასაზღვრო უწყებების საბრძოლო შესაძლებლობები და მობილური ჯგუფების ეფექტურობა არა მხოლოდ სახმელეთო, არამედ საზღვაო მიმართულებითაც. პირველ რიგში, რა თქმა უნდა, ეს ეხება შავ ზღვას“, - აღნიშნა პუტინმა.
2024 წლის გაზაფხულზე ჯარში გაწვევის ფარგლებში რუსეთში უწყისები ელექტრონულად გაიგზავნება. ამის შესახებ რუსეთის დუმის თავდაცვის კომიტეტის თავმჯდომარემ ანდრეი კარტაპოლოვმა განაცხადა, ინფორმაციას Deutche Welle ავრცელებს.„ელექტრონული უწყისების გაგზავნა შემოდგომაზეც ხდებოდა და ახლაც მოხდება“, - განაცხადა კარტაპოლოვმა.მისი თქმით, ჯარში გაწვევის შესახებ მოსახლეობას კვლავ ტრადიციული, ქაღალდის უწყისითაც აცნობებენ. კარტაპოლოვი პირობას დებს, რომ ჯარში გაწვეულ სამხედროებს უკრაინაში ომში არ გააგზავნიან.2023 წელს რუსეთში მიღებული საკანონმდებლო ცვლილებებით ელექტრონული უწყისები დაკანონდა. ელექტრონული უწყისი გაგზავნილად ითვლება შესაბამის საიტზე მისი განთავსების მომენტიდან. ცვლილებების მიხედვით, რუსეთის მოქალაქეებს, რომლებსაც სამხედრო სამსახური ეხებათ, რუსეთიდან გასვლა ეკრძალებათ. თუ წვევამდელი სამხედრო კომისარიატში არ გამოცხადდება 20 დღის ვადაში, მის წინააღმდეგ გარკვეული შეზღუდვები ამოქმედდება, კერძოდ, ის ინდმეწარმედ ვერ დარეგისტრირდება. ასევე ვერ შეძლებს ავტომობილის და უძრავი ქონების რეგისტრაციას, გაუუქმდება მართვის მოწმობა და ვერ მიიღებს საბანკო კრედიტს.
მოსკოვისთვის ცნობილია ნატოს სურვილი, რომ გააფართოოს თავისი გავლენა და არასტაბილურობა შემატოს რეგიონს, - ამის შესახებ კრემლის პრესსპიკერმა დმიტრი პესკოვმა განაცხადა, რითაც გამოეხმაურა კავკასიაში ალიანსის გენერალური მდივნის იენს სტოლტენბერგის ვიზიტს.„ნატოს ზოგადი მისწრაფებები, რომ გააძლიეროს თავისი კავკასიაში ყოფნა ჩვენთვის კარგადაა ცნობილი და ეს შეუიარაღებელი თვალითაც კარგად ჩანს. მისი გავლენები, ნაკლებ სავარაუდოა, რომ სტაბილურობას შემატებს კავკასიას და სიტუაციის პროგნოზირებადობას“, - აღნიშნავს კრემლის წარმომადგენელი.კრემლის სპიკერმა აღნიშნა, რომ რუსეთი აპირებს, ყურადღება გაამახვილოს ორმხრივ ურთიერთობებსა და თანამშრომლობის ინსტრუმენტებზე, რომლებიც მოსკოვს ამ რეგიონის ქვეყნებთან აქვს.„რა თქმა უნდა, ჩვენ ყურადღებით ვადევნებთ თვალყურს, მაგრამ ვაპირებთ, ძირითადად გავამახვილოთ ყურადღება ჩვენს ორმხრივ ურთიერთობებზე და თანამშრომლობის ინსტრუმენტებზე, რომლებიც ჩვენს ქვეყანას აქვს ამ რეგიონის ქვეყნებთან“, - დასძინა პესკოვმა.
რუსი მოხალისეების რეიდი ბელგოროდის და კურსკის ოლქებში საკმაოდ წარმატებულია. ამის შესახებ „უნიანი“ იუწყება.ამ ინფორმაციის მიხედვით, წინააღმდეგობის მოძრაობის რეიდი იმის გამო გახდა აუცილებელი, რომ პუტინის რეჟიმის წინააღმდეგ ლეგალური პოლიტიკური ბრძოლის ყველა მექანიზმი განადგურებულია. რეიდი უკვე ერთ კვირაზე მეტი ხნის განმავლობაში გრძელდება.„მოხალისეთა ქვედანაყოფებმა რუსეთში მნიშვნელოვან წარმატებას მიაღწიეს. ისინი რუსეთის ფედერაციის რამდენიმე დასახლებულ პუნქტს აკონტროლებენ. განადგურებულია მოწინააღმდეგის ტექნიკა, პირადი შემადგენლობა, აყვანილია ტყვეები. რუსეთის ხელისუფლებამ ამ კრიზისულ სიტუაციასთან გამკლავების სრული უუნარობა გამოიჩინა“, - წერია მოხალისეთა განცხადებაში.მათი თქმით, რუსეთის ხელისუფლებამ ბელგოროდის და კურსკის მოსახლეობის მიმართ სრული გულგრილობა გამოიჩინა. განცხადებაში ასევე აღნიშნულია, რომ რუსეთის შეიარაღებული ოპოზიცია ამიერიდან რუსეთის ფედერაციის ტერიტორიაზე სრულფასოვანი სუბიექტია, რომელიც სამხედრო-პოლიტიკურ თამაშში მონაწილეობს.ცნობისთვის, უკრაინიდან რუსეთის ბელგოროდის და კურსკის ოლქებში 12 მარტს ლეგიონი „თავისუფლება რუსეთს“, „რუსეთის მოხალისეთა კორპუსი“ და „ციმბირის ბატალიონი“ შეიჭრა. ამ დაჯგუფებებმა რამდენიმე დასახლება აიღეს და კურსკის და ბელგოროდის ოლქებში განლაგებულ რუსულ სამხედრო ობიექტებს ცეცხლს უხსნიან. რუსი მოხალისეები საკუთარი რეიდის ამსახველ ვიდეოებს პერიოდულად ავრცელებენ.
უკრაინაში ომი გრძელდება და შეერთებული შტატები არ დაუშვებს უკრაინის დამარცხებას, - ამის შესახებ აშშ-ის თავდაცვის მინისტრმა ლოიდ ოსტინმა განაცხადა.აშშ-ის თავდაცვის მდივანმა აღნიშნა, რომ უკრაინის ჯარებს მძიმე პირობები და სასტიკი ბრძოლა ელოდებათ, ხოლო მშვიდობიანი მოსახლეობა მუდმივად იძულებულია გაუძლოს რუსული რაკეტების და ირანული დრონების მიერ დაბომბვას. „დღეს ჩვენი გზავნილი ნათელია: შეერთებული შტატები არ დაუშვებს უკრაინის დამარცხებას. ეს კოალიცია არ დაუშვებს უკრაინის დამარცხებას. თავისუფალი სამყარო არ დაუშვებს უკრაინას დამარცხებას“, - აცხადებს ოსტინი. პენტაგონის ხელმძღვანელის თქმით, გასულ კვირას შეერთებულმა შტატებმა გამოაცხადა უკრაინისთვის დამატებითი დახმარება 300 მილიონი დოლარის ოდენობით. „ეს არის გადაუდებელი ღონისძიება უკრაინის საჰაერო თავდაცვის, არტილერიისა და ტანკსაწინააღმდეგო შესაძლებლობების ყველაზე მწვავე საჭიროებების მხარდასაჭერად“, - დასძენს აშშ-ის თავდაცვის მინისტრი.
რუსეთის პრეზიდენტი ვლადიმერ პუტინი მაისში ჩინეთში ჩავა სი ძინპინთან მოლაპარაკებებისთვის, რაც იქნება მისი პირველი მოგზაურობა საზღვარგარეთ არჩევნებში გარდაუვალი გამარჯვების შემდეგ, - ამის შესახებ „როიტერი“ წერს. „როიტერს“ კიდევ ერთმა წყარომ განუცხადა, რომ ვლადიმერ პუტინის ჩინეთში ვიზიტი მაისის მეორე ნახევარში შედგება.ინფორმაციას არც უარყოფენ და არც ადასტურებენ კრემლში, სადაც „როიტერს“ განუცხადეს, რომ ვლადიმერ პუტინის ვიზიტების შესახებ ინფორმაცია გამგზავრების თარიღის მოახლოებასთან ერთად გავრცელდება.პუტინმა ჟურნალისტებს კვირას განუცხადა, რომ რუსეთი და ჩინეთი იზიარებენ მსგავს გლობალურ პერსპექტივას და რომ მოსკოვი და პეკინი შემდგომ წლებში განავითარებენ კავშირებს.ჩინეთის პრეზიდენტი რუსეთს ეწვია გასული წლის მარტში.
აფეთქებების ფონზე, ბელგოროდის ოლქის ხელისუფლება 9 000 ბავშვს გადაანაწილებს რუსეთის სხვა რეგიონებში. ამის შესახებ ბელგოროდის გუბერნატორმა ვიაჩესლავ გლადკოვმა განაცხადა.„ამ დროისთვის, ვგეგმავთ 9 000 ბავშვის გაყვანას ბელგოროდიდან, ბელგოროდის რაიონიდან, შებეკინსკის და გრეივორონსკის რაიონებიდან. 22 მარტს, 1 200 ბავშვს გადავიყვანთ პენზაში, ტამბოვსა და კალუგში. შემდეგი არის სტავროპოლის ტერიტორია. სისტემა ჩამოყალიბებულია“, - აცხადებს ვიაჩესლავ გლადკოვი. მისი სიტყვებით, უკრაინული მხრიდან დაბომბვებს რეგიონში 16 მშვიდობიანი სიცოცხლე ემსხვერპლა, 98 კი დაშავდა.
სომხეთის პრემიერის, ნიკოლ ფაშინიანის განცხადებას იმასთან დაკავშირებით, რომ „სომხეთმა არ სურს, დაუშვას ომის დაწყება“, რუსეთის საგარეო საქმეთა სამინისტრო გამოეხმაურა. როგორც უწყების პრესმდივანი მარია ზახაროვა აცხადებს, ომთან დაკავშირებით ფაშინიანის განცხადება, დასავლეთთან სომხეთის კონსულტაციების შედეგია. „სადამდე მიიყვანეს საქმე მათმა ახალმა კურატორებმა ევროკავშირიდან, NATO-დან და ვაშინგტონიდან? აღნიშნული განცხადება არანაირ კავშირში არ არის რუსეთთან. ეს, ერევნის დღევანდელი ხელისუფლების განსაკუთრებული კომპეტენცია და დასავლეთთან მათი კონსულტაციების შედეგი“, - აცხადებს ზახაროვა. შეგახსენებთ, ნიკოლ ფაშიანიანმა განაცხადა, რომ დაწყებულია აზერბაიჯანთან საზღვრის დელიმიტაცია.„ჩვენი პოლიტიკა არის ის, რომ არ უნდა დავუშვათ ომის დაწყება“, - აღნიშნა ფაშინიანმა.
2024 წლის 30 მარტიდან სომხეთში, რუსულ საბანკო ბარათს, „მირს“ აღარ მიიღებენ. ამის შესახებ „ეხო კავკაზა“ იუწყება.გამონაკლისი იქნება მხოლოდ რუსული VTB ბანკის სომხეთის ფილიალი, სადაც ამ ბარათით თანხის გამოტანა ჯერ კიდევ შესაძლებელი იქნება. სხვა სომხურ ბანკებში და POS-ტერმინალებში ეს ბარათი აღარ იმოქმედებს.რუსული საგადამხდელო სისტემა და „მირის“ ბარათები 2024 წლის თებერვალში სანქციების ქვეშ მოხვდა, ვინაიდან ამ სისტემის დახმარებით რუსეთი სანქციებს გვერდს უვლის და საერთაშორისო ფინანსურ ინსტიტუტებთან კავშირს ინარჩუნებს. ამ კომპანიასთან თანამშრომლობის შემთხვევაში სანქციები უკვე სხვა კომპანიებზეც გავრცელდება.რუსული საგადამხდელო სისტემა 2014 წელს, რუსეთის მიერ ყირიმის ანექსიის შემდეგ შეიქმნა, რადგანაც მაშინაც საერთაშორისო საგადამხდელო სისტემებიდან რუსეთის გათიშვის საფრთხე არსებობდა. სომხეთში „მირის“ ბარათების გამოყენება 2017 წლიდან დაიწყო, ამ ქვეყნის გარდა, ეს სისტემა მოქმედებდა ყაზახეთში, ბულგარეთში, ყირგიზეთში, ტაჯიკეთში, ვიეტნამში, ვენესუელასა და კუბაზე. სანქციების დაწესების შემდეგ სხვადასხვა ქვეყნებმა ამ სისტემაზე და ბარათებზე უარი თქვეს.
7 ოქტომბრის შემდეგ, ღაზას სექტორში სულ მცირე 31 819 პალესტინელია დაღუპული, 73 934 კი დაშავებული. ამის შესახებ ინფორმაციას ღაზას ჯანდაცვის სამინისტრო ავრცელებს. ღაზაში ომმა 4 თვეში იმაზე მეტი ბავშვი იმსხვერპლა, ვიდრე მსოფლიო კონფლიქტებმა 4 წლის განმავლობაში - UNRWAთუმცა, როგორც The Times of Israel აღნიშნავს, არ კონკრეტდება, რამდენი სამოქალაქო პირია დაღუპულთა შორის. ისრაელის განცხადებით, ღაზას სექტორში „ჰამასის“ 13 000 წევრი ჰყავთ ლიკვიდირებული, დაახლოებით 1 000 კი ისრაელის ტერიტორიაზე იქნა ლიკვიდირებული მას შემდეგ, რაც „ტერორისტულმა“ დაჯგუფებამ ქვეყნის საზღვარი გადაკვეთა.ოფიციალური ცნობების მიხედვით, თავდასხმას 1 160 ადამიანი ემსხვერპლა, 250 ადამიანი კი, მათ შორის ბავშვები, ტყვედ ჩავარდნენ.
ჩვენი პოლიტიკა არის ის, რომ არ უნდა დავუშვათ ომის დაწყება, - ამის შესახებ სომხეთის პრემიერ-მინისტრმა ნიკოლ ფაშინიანმა განაცხადა.ფაშინიანის თქმით, სომხეთსა და აზერბაიჯანს შორის დემარკაცია-დელიმიტაციის პროცესი პრაქტიკულ დონეზე ადის.„ვხედავთ, რომ შესაძლებელია, დაიწყოს სომხეთსა და აზერბაიჯანს შორის სახელმწიფო საზღვრის დელიმიტაციისა და დემარკაციის პროცესი ბაგანისიდან ბერქაბერამდე მონაკვეთზე. ჩვენი პოლიტიკა არის ის, რომ არ უნდა დავუშვათ ომის დაწყება. სწორედ ამიტომ გადავწყვიტეთ, რომ ამ ტერიტორიებზე სომხეთის რესპუბლიკის საზღვრის დაზუსტებაზე უნდა ვიფიქროთ“, - აღნიშნა სომხეთის პრემიერ-მინისტრმა.