რუსებმა ირპენის მერს სიცოცხლის შენარჩუნების სანაცვლოდ ქალაქის დათმობა შესთავაზეს - რა პასუხი მიიღეს მათ

1646731782

კიევის ოლქის ირპენის მერმა ალექსანდრე მარკუშინმა გუშინ, 17:58 საათზე, რუსებისგან მიიღო შეტყობინება ქალაქის დათმობის წინადადებით, წინააღმდეგ შემთხვევაში მოკვლით დაემუქრნენ. ამის შესახებ უკრაინული მედია UNIAN წერს.

👉 რუსეთ-უკრაინის ომი - უახლესი ამბები (Live)

შეტყობინებაში დამპყრობლები მიანიშნებენ, რომ მათთან თანამშრომლობა მარკუშინს სიცოცხლის გადარჩენაში დაეხმარება და ასევე, ფინანსური მდგომარეობა გაუუმჯობესდება.

„ძვირფასო ალექსანდრე, თქვენ გაქვთ შესაძლებლობა გადაარჩინოთ საკუთარი სიცოცხლე და ჯანმრთელობა, შესაძლოა ფინანსური მდგომარეობაც. შეთავაზებით დაინტერესების შემთხვევაში გამოგზავნეთ პასუხი +. შეთავაზება მოქმედებს 24 საათის განმავლობაში“, - წერენ რუსები.

მარკუშინმა მათ - (მინუსი) გაუგზავნა და დაწერა:

„მიკვირს, რომ ამ მახინჯმა არსებებმა ჯერ კიდევ ვერ გაიგეს - ირპენი არ ნებდება, ირპენი არ იყიდება, ირპენი იბრძვის! მე კონტრ-საჯარო შეთავაზებას ვაძლევ ოკუპანტებს, დატოვონ ირპენის თემის ტერიტორია 24 საათში და გადაარჩინონ რამდენიმე ათასი რუსი წვევამდელი ჯარისკაცის სიცოცხლე და ჯანმრთელობა, რომლებსაც სახლში ელოდებათ დედა, და, ქალიშვილი, ბებია. დაბრუნდით რუსეთში და თქვენს გარეშეც მივულოცავთ ირპენის თემის ქალებს“ - დაწერა ქალაქის მერმა.