„დონეცკი და ლუგანსკი უკრაინაა“ - იენს სტოლტენბერგი
1645476894
ნატოს გენერალური მდივანი იენს სტოლტენბერგი აცხადებს, რომ პუტინის გადაწყვეტილება დონეცკისა და ლუგანსკის აღიარების შესახებ ძირს უთხრის უკრაინის ტერიტორიულ მთლიანობას და არღვევს მინსკის შეთანხმებებს.
„მე ვგმობ რუსეთის გადაწყვეტილებას თვითგამოცხადებული დონეცკის სახალხო რესპუბლიკისა და ლუგანსკის სახალხო რესპუბლიკების აღიარების შესახებ. დონეცკი და ლუგანსკი უკრაინის ნაწილია. მოსკოვი აგრძელებს კონფლიქტის გაღვივებას“, - განაცხადა სტოლტენბერგმა.
სტოლტენბერგი აღნიშნავს, რომ 2015 წელს გაეროს უშიშროების საბჭომ, რომლის წევრიც არის რუსეთი, დაადასტურა სრული პატივისცემა უკრაინის სუვერენიტეტის, დამოუკიდებლობისა და ტერიტორიული მთლიანობისადმი.
ალიანსი მხარს უჭერს უკრაინის სუვერენიტეტსა და ტერიტორიულ მთლიანობას მის საერთაშორისოდ აღიარებულ საზღვრებში.
„მოკავშირეები მტკიცედ მოუწოდებენ რუსეთს აირჩიოს დიპლომატიური გზა და დაუყოვნებლივ მიატოვოს სამხედრო ძალაუფლების ფართომასშტაბიანი ზრდა უკრაინაში და მის გარშემო, ასევე, გაიყვანოს თავისი ჯარები უკრაინიდან მისი საერთაშორისო ვალდებულებების შესაბამისად“, - ნათქვამია განცხადებაში.
შეგახსენებთ, პუტინმა დონეცკისა და ლუგანსკის დამოუკიდებლობა აღიარა. ამის შესახებ მან განცხადება პირდაპირ ეთერში გააკეთა.
ვლადიმერ პუტინის ვიდეომიმართვა, დაახლოებით 40 წუთის განმავლობაში მიმდინარეობდა. როგორც მან პირდაპირ ეთერში საუბრისას აღნიშნა, დონბასში ვითარებამ კვლავ კრიტიკული, მწვავე ხასიათი მიიღო. პუტინის განცხადებით, რუსეთისთვის უკრაინა უბრალოდ მეზობელი ქვეყანა არ არის.
ამავე თემაზე:
📎 შარლ მიშელი დონეცკისა და ლუგანსკის აღიარებასთან დაკავშირებით პუტინის გადაწყვეტილებას ეხმაურება
📎 „მივიღე გადაწყვეტილება, ვაღიარო დონეცკისა და ლუგანსკის დამოუკიდებლობა“ - ვლადიმერ პუტინი
📎 მეგალომანი - რომელსაც სულ უფრო ცოტა დრო რჩება...
📎 აქვს თუ არა ვლადიმერ პუტინს გეგმა B და რა მოხდება თუ რუსეთი უკრაინაში შეიჭრება?
