ვიქტორია სპარცის განცხადება უკრაინიდან იარაღის სირიაში ან მექსიკაში მოხვედრის შესახებ რუსეთის ნარატივს ემთხვევა - დმიტრო კულება
1658157680
უკრაინის საგარეო საქმეთა მინისტრი დმიტრო კულება ამერიკელი კონგრესმენის ვიქტორია სპარცის განცხადებას გამოეხმაურა, რომელმაც თქვა, რომ კონგრესს აინტერესებს, რაში იხარჯება უკრაინისთვის გამოყოფილი ამერიკული სახსრები. სპარცის თქმით, შესაბამისი საზედამხედველო სამსახურების არარსებობის გამო აშშ-ის მიერ მიწოდებული იარაღი შესაძლოა, სირიაში ან მექსიკაში აღმოჩნდეს.
„მე არ ვსაუბრობ რთული სიტყვებით. ეს არის ნარატივი, 100 პროცენტით რუსეთის ფედერაციის მიერ დაწყებული. შემდეგ ქალბატონმა სპარცმა თქვა, რომ ეს იარაღი შეიძლება, აღმოჩნდეს სირიაში ან მექსიკაში. მესმის, რატომ. იმიტომ, რომ სიტყვა მექსიკა მუშაობს აშშ-ის საშინაო პოლიტიკის თვალსაზრისით. მე არ მაქვს იმის მტკიცების საფუძველი, ავრცელებს თუ არა ის ამ ნარატივს შეგნებულად, თუ შეუგნებლად. მსურს, მკაფიოდ დავაფიქსირო ეს, მაგრამ ის, რომ მისი და რუსეთის ფედერაციის ნარატივი ერთმანეთს ემთხვევა, ეს ფაქტია, რომელიც ყველამ ნახა“, – განაცხადა უკრაინის საგარეო საქმეთა მინისტრმა.
მანამდე, ვიქტორია სპარცმა უკრაინის პრეზიდენტის აპარატის უფროსს ანდრეი ერმაკს „საეჭვო რეპუტაციის მქონე ადამიანი“ უწოდა და გადადგომისკენ მოუწოდა.
ასევე დაგაინტერესებთ:
👉 რუსებმა საკუთარი გამანადგურებელი თვითმფრინავი სუ-34 ჩამოაგდეს - უკრაინული მედია
